Shumë prindër zgjedhin të flenë me fëmijët e tyre në të njëjtin shtrat, qoftë për t’i qetësuar gjatë natës, për t’i ushqyer më lehtë apo për t’i bërë të ndihen më të sigurt.
Për shumë familje kjo është një praktikë e zakonshme dhe e natyrshme.
Megjithatë, një studim i publikuar në revistën shkencore Journal of Affective Disorders sugjeron se, në disa raste, kjo rutinë mund të lidhet me vështirësi emocionale dhe të sjelljes te fëmijët në moshë më të madhe.
Në studim u përfshinë 3,583 fëmijë, me qëllim të vlerësohej ndikimi që ka ndarja e shtratit me prindërit në zhvillimin e tyre.
Studiuesit i ndanë pjesëmarrësit në katër grupe: fëmijët që nuk kishin fjetur kurrë në të njëjtin shtrat me nënën e tyre, ata që e kishin bërë këtë vetëm gjatë periudhës së foshnjërisë, fëmijët që kishin vazhduar të flinin me prindërit deri në moshën 6-vjeçare dhe ata që ende vazhdonin ta kishin këtë zakon.
Rezultatet treguan se fëmijët që kishin ndarë shtratin me prindërit për një periudhë më të gjatë kishin më shumë gjasa të shfaqnin probleme me përqendrimin, si edhe vështirësi në kontrollin e emocioneve dhe sjelljes.
Sipas studiuesve, në këtë grup u vu re një prirje më e lartë për simptoma të ankthit, depresionit dhe çrregullimeve të sjelljes. Gjithashtu, disa prej tyre shfaqnin më shpesh karakteristika të lidhura me çrregullimin e deficitit të vëmendjes dhe hiperaktivitetit (ADHD).
Megjithatë, autorët e studimit theksojnë se rezultatet nuk provojnë domosdoshmërisht se gjumi në të njëjtin shtrat është shkaku i këtyre problemeve. Faktorë të tjerë, si stili i prindërimit, mjedisi familjar, gjendja emocionale e prindërve apo karakteristikat individuale të fëmijës, mund të kenë ndikuar gjithashtu në rezultatet e vëzhguara.
Ekspertët këshillojnë që prindërit të krijojnë gradualisht zakone të shëndetshme gjumi, duke i ndihmuar fëmijët të mësohen të flenë në shtratin e tyre, sidomos me rritjen e moshës. Kjo mund të ndihmojë në zhvillimin e pavarësisë, vetëbesimit dhe një rutine më të qëndrueshme të gjumit.
Është e rëndësishme të theksohet se këto përfundime nuk vlejnë për foshnjat, pasi rekomandimet për gjumin gjatë muajve të parë të jetës janë të ndryshme dhe bazohen në udhëzimet e sigurisë për të ulur rrezikun e komplikacioneve gjatë gjumit.
Për këtë arsye, prindërit duhet të konsultohen gjithmonë me pediatrin dhe të zgjedhin mënyrën më të përshtatshme të gjumit, duke marrë parasysh moshën dhe nevojat e fëmijës, do t’iu jemi mirenjohes nese do te na ndihmonit që të mirmbajmë faqen vetëm duke shtypur(mbi foton) që ndodhet më poshtë.Faleminderit për mirkuptimin SHQIPE
