Një grua është arrestuar nga Policia e Shtetit pasi dyshohet se ka vjedhur 5 mijë euro nga një pikë këmbimi valutor dhe transferta parash në zonën e “Varrit të Bamit” në Tiranë.
Sipas raportimeve të mediave shqiptare, e dyshuara, Kumrie Zika, ishte paraqitur fillimisht si e interesuar për t’u punësuar në biznes. Pas pranimit në punë, ajo dyshohet se ka përfituar nga një moment shpërqendrimi i një punonjësi dhe ka marrë shumën e parave nga arka, duke u larguar menjëherë nga lokali.
Raportohet se ngjarja është regjistruar nga kamerat e sigurisë, pamje që kanë ndihmuar policinë në identifikimin e të dyshuarës. Pas verifikimeve, autoritetet kanë bërë të mundur lokalizimin dhe arrestimin e saj vetëm pak orë pas ngjarjes.
Mediat raportojnë gjithashtu se emri i së dyshuarës është përmendur edhe më herët në denoncime të publikuara nga pronarë biznesesh, të cilët kanë pretenduar se ajo përdorte të njëjtën skemë: paraqitej për punë, punonte për një periudhë të shkurtër dhe më pas dyshohet se largohej duke marrë para nga arka. Këto pretendime nuk janë konfirmuar me vendime gjyqësore.
Po sipas raportimeve mediatike, e dyshuara ka qenë e ftuar në disa emisione televizive për të diskutuar tema që lidhen me tregun e punës dhe punësimin.
Policia dhe Prokuroria po vijojnë hetimet për të dokumentuar plotësisht rrethanat e rastit dhe për të verifikuar nëse e dyshuara mund të ketë lidhje me ngjarje të tjera të ngjashme.
Shënim: Personi i përmendur në këtë lajm prezumohet i pafajshëm derisa fajësia e tij të provohet me vendim të formës së prerë nga gjykata, do t’iu jemi mirenjohes nese do te na ndihmonit që të mirmbajmë faqen vetëm duke shtypur(mbi foton) që ndodhet më poshtë.Faleminderit për mirkuptimin SHQIPE
