Sipas Avokatit të Popullit, punësimi i të miturve rregullohet në mënyrë strikte nga legjislacioni shqiptar dhe konventat ndërkombëtare për të drejtat e fëmijëve, ndërsa autoritetet përgjegjëse duhet të veprojnë urgjentisht për të garantuar zbatimin e ligjit.
“Punësimi i të miturve rregullohet në mënyrë strikte nga legjislacioni shqiptar i punës dhe nga detyrimet ndërkombëtare që Shqipëria ka ndërmarrë nëpërmjet Konventës për të Drejtat e Fëmijëve. Në këtë kontekst, institucionet përgjegjëse thirren të veprojnë urgjentisht për të garantuar zbatimin e ligjit.
Avokati i Popullit ka njoftuar se do të ndjekë nga afër veprimet e autoriteteve dhe do të monitorojë nëse janë përmbushur detyrimet ligjore, duke informuar publikun rreth përfundimeve të hetimit administrativ.
Videoja që ngriti alarmin
Gjergj Luca publikoi në rrjetet sociale pamje nga një kantier ndërtimi që ai zotëron, ku shihen dy të mitur të moshës 14-15 vjeç duke punuar me hekur.
Në video, të miturit nuk duket se janë të pajisur me pajisje mbrojtëse dhe nuk ka prova të mbikëqyrjes profesionale, duke ngritur pikëpyetje në lidhje me sigurinë në punë dhe respektimin e të drejtave të tyre.
Klikoni në link për të parë VIDEON
Çfarë parashikon Kodi i Punës?
Legjislacioni shqiptar nuk e ndalon punësimin e të rinjve mbi 16 vjeç, por vendos kufizime të qarta. Kodi i Punës ndalon angazhimin e të miturve në punë të rënda, në temperatura ekstreme ose në aktivitete që kërkojnë pozicione dhe lëvizje të detyruara të trupit.
Gjithashtu, një vendim i Këshillit të Ministrave i vitit 2017 parashikon rregulla shtesë mbrojtëse dhe nuk u lejon të miturve të punojnë më shumë se 6 orë në ditë.
Precedenti me nxënësit e shkollave të mesme në fabrikë
Ky nuk është rasti i parë që ka ngritur debat në lidhje me përfshirjen e të miturve në aktivitetet e biznesmenit. Në qershor 2022, Luca publikoi një video ku shfaqeshin disa vajza të shkollës së mesme duke punuar në fabrikën e përpunimit të karkalecave në Elbasan, së bashku me nënat e tyre.
Ai e paraqiti këtë si një formë edukimi për të rinjtë, duke argumentuar se ata duhet të mësojnë si të fitojnë para. Pas inspektimit, Inspektorati Shtetëror i Punës deklaroi se nuk kishte gjetur shkelje, duke vlerësuar se puna nuk rrezikonte shëndetin ose zhvillimin e të miturve.
Megjithatë, organizatat e shoqërisë civile e kundërshtuan këtë përfundim, duke argumentuar se puna në temperatura të ulëta dhe ulja e zgjatur përbënte rrezik për fëmijët dhe shkelte standardet e mbrojtjes së fëmijëve.
Imazhet e fundit nga kantieri i ndërtimit kanë rindezur debatin mbi pajtueshmërinë me legjislacionin për punësimin e të miturve dhe kanë rritur kërkesat për verifikime të plota nga institucionet përgjegjëse, do t’iu jemi mirenjohes nese do te na ndihmonit që të mirmbajmë faqen vetëm duke shtypur(mbi foton) që ndodhet më poshtë.Faleminderit për mirkuptimin SHQIPE
