Mes personave të shpallur në kërkim pas përplasjes së një dite më parë në zonën e Radhimës, në ambientet e “Regina Palm Resort”, raportohet se është edhe vëllai i biznesmenit Luan Muça, ish-deputeti Bujar Muça.
Sipas asaj që raporton Shqiptarja.com, krahas personave të tjerë të përfshirë në ngjarje, Policia e Vlorës ka shpallur në kërkim edhe ish-deputetin Bujar Muça. Ende nuk dihet se cili ka qenë roli i tij konkret në konfliktin mes dy grupeve të biznesmenëve, ndërsa hetimet për zbardhjen e plotë të dinamikës vijojnë.
Sakaq nga po e njëjta media raportohet se grupi hetimor ka dyshime se një person ka mbetur i plagosur me armë zjarri, pasi në një prej makinave të sekuestruara u gjetën njolla gjaku. Megjithatë nuk përjashtohet as mundësia që dikush të jetë lënduar nga xhamat e automjetit. Policia është duke u interesuar në spitalet publike dhe jo publike pranë Fierit, Vlorës apo dhe në Tiranë, në rast se dikush është paraqitur i plagosur. Lidhur me këto dyshime si dhe me emrin e ish-deputetit pritet një reagim zyrtar dhe i detajuar nga autoritetet dhe të gjitha informacionet e lartpërmendura janë thjesht raportime mediatike.
Sakaq kujtojmë se një ditë më parë vetë kryepolici i Vlorës, Ervin Ndreu, në një deklaratë për mediat sqaroi se policia ishte njoftuar rreth orës 11:30 për një kërcënim me armë zjarri ndaj biznesmenit Vasil Bedinaj në ambientet e resortit “Regina Palm” në Radhimë.
Pas marrjes së njoftimit, shërbimet e policisë ngritën pika kontrolli në qytetin e Vlorës dhe në aksin drejt Dhërmiut, ndërsa u njoftuan edhe strukturat e Policisë së Fierit dhe Gjirokastrës.
I vëllai me shoqëruesit e tij rrethuan pronarin e “Regina
momenti kur Luan Muça (me shigjete) dhe shoqeruesit e tij, rrethojne Vasil Bedinaj
Sipas versionit të bërë publik nga Ndreu, rreth orës 12:00, në pikën e kontrollit në Alikokë, një automjet tip “Range Rover” nuk iu bind urdhrit të policisë për të ndaluar dhe vijoi lëvizjen në drejtim të fshatit Peshkëpi. Në urën e Peshkëpisë, automjeti humbi drejtimin dhe u përplas me barrierat e rrugës.
Në automjet ndodheshin biznesmeni Luan Muça dhe vëllezërit Klaudio e Mandid Lleshaj, të cilët, sipas policisë, janë punonjës të “SWAT Security”. Si pasojë e aksidentit, Luan Muça dhe Mandid Lleshaj mbetën të plagosur dhe u transportuan në spital. Gjatë kontrollit të automjetit, policia gjeti një pistoletë dhe një krehër me 16 fishekë.
Por ngjarja nuk u mbyll me aksidentin pasi rreth orës 13:00, shërbimet e Policisë së Fierit ndaluan në bypass-in e Fierit, në zonën e Mbikalimit të Memorialit, një automjet të shpallur në kërkim, i dyshuar se ishte përdorur në konfliktin e Radhimës. Në drejtim të tij ndodhej shtetasi kosovar Blerim Heta.
Sipas kryepolicit Ervin Ndreu, automjeti kishte dëmtime në xhamin dhe krahun e pasagjerit, të shkaktuara nga armë zjarri, ndërsa brenda tij u gjetën edhe tre fishekë pistolete.
“Në orën 13:00 pika e kontrollit në Fier te Mbikalimi i Memorialit, ka ndaluar një automjet të shpallur në kërkim për këtë ngjarje, me drejtues shtetasin kosovar Blerim Heta. Nga kontrolli, kishte dëmtime në xham, krahu i pasagjerit, të shkaktuara nga armë zjarri. Brenda janë gjetur 3 fishekë pistolete.
Rreth orës 16:30 në Bypassin e Vlorës, në Kaninë është konstatuar duke u djegur një automjet Audi A8 i dyshuar i përdorur në ngjarje”, njoftoi kryepolici i Vlorës, duke konfirmuar se dhe Audi A8 që po digjej në Kaninë 5 orë pas ngjarjes, ishte i Luan Muçës, biznesmeni pronarë i Deltës.
I vëllai me shoqëruesit e tij rrethuan pronarin e “Regina
Tre nga makinat e ndaluara nga Policia e Vlores
Për këtë ngjarje, janë arrestuar pesë shtetas dhe janë shpallur në kërkim gjashtë të tjerë, si dhe katër makina të dyshuara të përfshira. Sipas kryepolicit Ervin Ndreu, biznesmeni Luan Muça dhe shoqëruesit e tij i kanë vendosur gjobë 5 milionë euro Vasil Bedinaj dhe i kanë lënë 48 orë kohë të largohej nga Shqipëria.
