Dhomat e Specializuara në Hagë kanë ndryshuar pjesërisht kufizimet që lidhen me vizitat ndaj ish-presidentit të Kosovës, Hashim Thaçi, duke lejuar rikthimin e disa vizitave jo të privilegjuara, ndërsa ndalesa mbetet në fuqi për katër persona.
Vendimi lidhet me çështjen e veçantë ndaj Thaçit për administrimin e drejtësisë, ku ai akuzohet se gjatë vizitave jo të privilegjuara në paraburgim u kishte përcjellë disa vizitorëve informacione konfidenciale për dëshmitarët e Prokurorisë dhe udhëzime lidhur me dëshmitë e tyre. Thaçi është deklaruar i pafajshëm për këto akuza.
Sipas vendimit të raportuar, është hequr me efekt të menjëhershëm ndalesa për vizitat e gjashtë personave. Mes emrave të bërë publikë janë Milaim Ahmetaj, Milaim Cakiqi dhe Avni Kastrati, ndërsa identiteti i tre personave të tjerë është redaktuar në versionin publik të dokumentit.
Megjithatë, vizitat e tyre do t’i nënshtrohen monitorimit aktiv. Masa lidhet me shqetësimet e ngritura më herët për komunikimin e informacioneve konfidenciale gjatë vizitave në objektin e paraburgimit. Aktakuza e konfirmuar në çështjen për administrimin e drejtësisë përmban pikërisht pretendime se informacione të tilla për dëshmitarët janë përcjellë gjatë vizitave jo të privilegjuara.
Gjatë vizitave që tashmë do të lejohen, autoritetet duhet të raportojnë çdo përpjekje për të komunikuar informacione konfidenciale, për të dhënë udhëzime që lidhen me dëshmitarët apo për të shkelur rregullat e objektit të paraburgimit.
Ndryshe është vendosur për Artan Behramin, Blerim Shalën, Ismail Sylën dhe Vllaznim Kryeziun. Për ta, kufizimi vazhdon të mbetet në fuqi dhe vizitat jo të privilegjuara me Thaçin nuk do të lejohen.
Vendimi vjen në një fazë kur procesi për administrimin e drejtësisë ka përfunduar paraqitjen e provave. Deklaratat përmbyllëse në këtë çështje u mbajtën nga 10 deri më 14 shtator 2026 dhe tashmë pritet vendimi i gjykatës.
Gjykatësi ka marrë parasysh edhe faktin se rrethanat procedurale kanë ndryshuar dhe se një pjesë e rrezikut që kishte çuar fillimisht në vendosjen e kufizimeve është zvogëluar.
Kështu, Thaçi do të mund të presë sërish disa prej personave që deri tani e kishin të ndaluar ta vizitonin, por takimet do të zhvillohen nën masa monitorimi, ndërsa për katër emrat e përcaktuar nga gjykata ndalesa vazhdon.
