Një aksident tragjik me motor i ka marrë jetën Laurent Krasniqit, TikTok-erit të njohur dhe ish-banor të “Big Brother VIP Kosova”, ndërsa partnerja e tij, e cila raportohet se ndodhej me të në momentin e ngjarjes, ka mbetur e plagosur rëndë. Tragjedinë e bën edhe më prekëse fakti se vetëm një muaj më parë Krasniqi i kishte propozuar asaj për martesë gjatë një fluturimi me helikopter në New York, moment që u bë viral në rrjet.
Aksidenti ka ndodhur mbrëmjen e 2 shtatorit në fshatin Llukar të Prishtinës. Policia e Kosovës ka bërë të ditur se rasti është raportuar rreth orës 20:20 dhe se në aksident janë përfshirë një motoçikletë dhe një automjet.
Krasniqi, 29 vjeç, është transportuar nga ekipi i Ndihmës së Shpejtë drejt Qendrës Klinike Universitare të Kosovës pa shenja jete.
Drejtori i Klinikës Emergjente në QKUK, Naser Syla, ka konfirmuar se ekipi mjekësor ndërmori masat e reanimimit, por i riu nuk arriti t’u mbijetonte plagëve të marra. Vdekja e tij është konstatuar në orën 21:40.
Sipas mediave në Kosovë, në momentin e aksidentit me Laurent Krasniqin ndodhej edhe partnerja e tij. Ajo ka pësuar lëndime të rënda dhe ndodhet në gjendje shumë të rëndë shëndetësore. Ky informacion nuk është konfirmuar deri tani zyrtarisht nga Policia e Kosovës apo QKUK-ja.
Historia e çiftit kishte marrë një tjetër drejtim vetëm një muaj përpara tragjedisë. Krasniqi i kishte propozuar partneres së tij për martesë gjatë një fluturimi me helikopter në New York. Një moment që duhej të shënonte nisjen e një kapitulli të ri në jetën e tyre, sot merr një tjetër peshë pas aksidentit fatal të 29-vjeçarit dhe raportimeve për gjendjen e rëndë të partneres së tij.
Sa i përket dinamikës së ngjarjes, ekzistojnë dyshime që motoçikleta po lëvizte me shpejtësi të madhe përpara aksidentit. Megjithatë, ky mbetet informacion paraprak dhe shkaku i aksidentit nuk është përcaktuar ende zyrtarisht.
Në media kanë qarkulluar edhe versione të ndryshme mbi mënyrën se si ndodhi ngjarja. Disa raportime flasin për rrëzimin e Krasniqit nga motori, ndërsa informacioni i Policisë së Kosovës bën të ditur se në aksident janë përfshirë një motoçikletë dhe një automjet. Njësiti i Trafikut Rajonal po merret me hetimin dhe zbardhjen e plotë të rrethanave.
Laurent Krasniqi ishte një emër i njohur për publikun në Kosovë. Ai kishte fituar popullaritet në rrjetet sociale si TikTok-er dhe komedian, ndërsa më pas u bë pjesë e “Big Brother VIP Kosova”.
Vdekja e tij në moshën 29-vjeçare ka sjellë reagime të shumta në rrjetet sociale, ndërsa vëmendja mbetet edhe te gjendja shëndetësore e partneres së tij dhe te hetimet që pritet të përcaktojnë dinamikën e plotë të aksidentit.
