Një ngjarje e rëndë është regjistruar sot në komunën e Hanit të Elezit, ku një 34-vjeçar është gjetur pa shenja jete në një lumë, në vendin e quajtur “Skollovc”, në fshatin Dërmjak.
Lajmi është konfirmuar për Sinjalin nga zëdhënësi i Policisë së Kosovës për rajonin e Ferizajt, Kanun Veseli.
Pas pranimit të informatës për rastin, në vendin e ngjarjes kanë dalë njësitet kompetente të Policisë së Kosovës, përfshirë Njësinë e Hetimeve Rajonale dhe Forenzikën, si dhe ekipet emergjente.
Trupi i 34-vjeçarit është nxjerrë nga uji, ndërsa në vendin e ngjarjes ka dalë edhe mjeku kujdestar i Qendrës Kryesore të Mjekësisë Familjare në Han të Elezit, i cili ka konstatuar vdekjen e tij.
Sipas informacioneve të bëra të ditura nga Policia, gjatë ekzaminimeve të para nuk janë vërejtur shenja të dukshme të lëndimeve në trupin e viktimës.
Megjithatë, shkaku i saktë i vdekjes nuk është përcaktuar ende.
Me urdhër të prokurorit kompetent, trupi i pajetë është dërguar në Institutin e Mjekësisë Ligjore në Prishtinë, ku do t’i nënshtrohet autopsisë.
Rezultatet e ekzaminimit mjekoligjor pritet të ndihmojnë në përcaktimin e shkakut të vdekjes dhe në sqarimin e rrethanave të rastit.
Policia e Kosovës ka bërë të ditur se rasti është iniciuar si “Hetim mbi vdekjen”, ndërsa hetimet po vazhdojnë nga njësitet kompetente policore.
Deri në përfundimin e procedurave hetimore dhe raportit të autopsisë, nuk dihen rrethanat që kanë çuar në vdekjen e 34-vjeçarit.
Ngjarja ka ndodhur sot në zonën e Dërmjakut të Hanit të Elezit, ndërsa autoritetet pritet të japin më shumë informacione nëse gjatë hetimeve dalin detaje të reja, do t’iu jemi mirenjohes nese do te na ndihmonit që të mirmbajmë faqen vetëm duke shtypur(mbi foton) që ndodhet më poshtë.Faleminderit për mirkuptimin SHQIPE
