Një kthesë e papritur ka shoqëruar lëvizjet e drejtoreshës së Shërbimit Informativ të Shtetit, Vlora Hyseni, pas masës së sigurisë të caktuar ndaj saj nga GJKKO.
Gjatë ditës, informacionet ishin se Hyseni ndodhej në Baku të Azerbajxhanit, ku kishte marrë pjesë në Forumin e 4-t të Sigurisë. Prania e saj jashtë vendit ishte edhe arsyeja përse masa e sigurisë nuk mund të ekzekutohej menjëherë nga autoritetet shqiptare.
Por vetëm disa orë më vonë, Hyseni është shfaqur në Kosovë.
Paraprakisht dyshohet se ajo ka mbërritur në aeroportin e Prishtinës nga Azerbajxhani, ndonëse sipas mediave të Kosovës sot nuk ka pasur urdhëtime nga shteti azer në Prishtinë.
Mësohet se ajo pasdite u është dorëzuar autoriteteve vendase, të cilat më pas e kanë shoqëruar në kufi në Vërmicë duke ja u dorëzuar autoriteteve shqiptare. Në procedurë janë përfshirë edhe agjentët e Byrosë Kombëtare të Hetimit, të cilët e kanë marrë në shoqërim.
Hysenit i është komunikuar masa e sigurisë “arrest në shtëpi”, ndërsa mësohet se shoqërimi i saj drejt Tiranës po kryhet nën masa sigurie.
Itinerari i Hysenit gjatë kësaj të marte merr rëndësi edhe për faktin se në momentin kur në Shqipëri po zhvilloheshin veprimet për ekzekutimin e vendimit të gjykatës, vendndodhja e bërë publike e saj ishte Baku. Vetëm më vonë u mësua se drejtuesja e SHISH kishte mbërritur në Kosovë.
Mbetet për t’u sqaruar koha e saktë kur Hyseni është larguar nga Azerbajxhani, kur ka mbërritur në Kosovë dhe në çfarë momenti autoritetet shqiptare janë informuar për lëvizjen e saj drejt Prishtinës.
GJKKO, me kërkesë të SPAK, caktoi ndaj Hysenit masën e sigurisë “arrest në shtëpi”, si dhe pezullimin nga ushtrimi i detyrës.
Pas vendimit reagoi edhe kryeministri Edi Rama, i cili njoftoi lirimin e menjëhershëm të Hysenit nga drejtimi i SHISH dhe deklaroi se do të konsultohej me Presidentin e Republikës për zgjedhjen e drejtuesit të ri të shërbimit.
Gazetari Elton Qyno ka risjellë një detaj interesant lidhur me hetimin ndaj Vlora Hysenit dhe prokurorit të dosjes, Altin Dumani.
Ai tha në Top Story se Altin Dumani, prokuror i SPAK, nuk po përballet për herë të parë me një drejtues të Shërbimit Informativ të Shtetit. Përpara dosjes ndaj Vlora Hysenit, Dumani ka pasur një përballje edhe me ish-drejtuesin e SHISH, Fatos Klosin.
“Ish-shefin e SHISH, Fatos Klosin e ka hetuar dhe më pas dërguar në gjyq, Altin Dumani, për ironi. Klosi ka marrë pafajësi nga gjykata për akuzën e shpërdorimit të detyrës për 15 tendera. Vijmë sërish tek Altin Dumani por kësaj here me Vlora Hysenin, drejtuesen e SHISH”, tha gazetari Elton Qyno në Top Story.
Dy çështjet janë të ndryshme, por kanë si pikë të përbashkët përfshirjen e drejtimit të SHISH-it në procese hetimore të ndjekura nga Dumani.
Në vitin 2003, kur ishte prokuror në Tiranë, Dumani hetoi ish-drejtorin e SHISH-it, Fatos Klosi, për shpërdorim detyre lidhur me administrimin e fondeve të institucionit.
Çështja përfundoi në gjykatë, ku Prokuroria kërkoi dënimin e Klosit me 1 milion lekë gjobë. Por një vit më vonë, Gjykata e Tiranës e shpalli Klosin të pafajshëm.
Vetëdorëzimi i Vlora Hysenit, gazetarja Anila Hoxha jep detaje: BKH i trokiti në derë, por… (çfarë pritet të ndodhë tani)
Më shumë se dy dekada më vonë, emri i Dumanit rikthehet në një çështje që prek drejtimin e SHISH-it.
Vlora Hyseni, tashmë ish-drejtuese SHISH akuzohet për përkrahje të autorit të krimit dhe nxjerrje të sekretit shtetëror.
Emri i Vlora Hysenit u qarkua nga prokurorët gjatë analizimit të të dhënave e siguruara nga hetimit i dosjes “AKSHI”, duke ngritur dyshime për favorizime prej Hysenit të biznesmenit Ergys Agasi, i arrestuar një muaj më parë.
Për llogari të të njëjtit hetim, urdhër të GJKKO, mëngjesin e së martës u ushtruan kontrolle në disa ambiente ne Tiranë e Durrës, përfshirë banesën e Ilir Prodës, ish-drejtuesin e Policisë së Shtetit. Përveç kontrollit, Proda dha deklarime për gati 2 orë në SPAK, godinë nga e cila doli në një gjendje emocionale jo shumë të qetë.
Veç masës ndaj Hysenit dhe kontrollit të Prodës, gjykata urdhëroi arrestimin e shefit të Laboratorit të Policisë Shkencore, Fatjon Kalluçi dhe Embro Sulejmani. Ata dyshohet se kanë dëmtuar disa pamje filmike në të cilat shfaqej biznesmeni Agasi gjatë qëndrimit në arrati.
