Gjykata Kushtetuese ka zbardhur vendimin mbi kërkesën e Edi Rama për pezullimin nga detyra të Belinda Balluku si zëvendëskryeministre dhe ministre e Infrastrukturës dhe Energjisë. Me një votim të ndarë 4 me 4, pa u arritur shumica e nevojshme prej 5 gjyqtarësh, kërkesa u konsiderua e rrëzuar dhe masa e pezullimit mbetet në fuqi.
Kryeministri iu drejtua Gjykatës Kushtetuese duke kërkuar zgjidhjen e një konflikti kompetencash mes pushtetit ekzekutiv dhe atij gjyqësor.
Ai kundërshtoi vendimin e Gjykata e Posaçme kundër Korrupsionit dhe Krimit të Organizuar, e cila kishte vendosur masën e “pezullimit nga detyra”, me argumentin se kjo ndërhyrje cenon funksionimin e Këshillit të Ministrave dhe tejkalon kompetencat kushtetuese të kryeministrit. Sipas tij, ministrat gëzojnë imunitetin e deputetit dhe Kushtetuta nuk parashikon pezullimin e tyre pa një mekanizëm të qartë juridik.
Kuvendi i Shqipërisë mbështeti këtë qëndrim, duke theksuar se ndërhyrja gjyqësore në përbërjen e qeverisë prek përgjegjësinë politike të ekzekutivit përpara parlamentit.
Nga ana e saj, Prokuroria e Posaçme argumentoi se masa e pezullimit është një vendim me karakter individual dhe penal, i parashikuar në nenin 242 të Kodit të Procedurës Penale, dhe nuk përbën konflikt kompetencash. Sipas saj, masa prek individin dhe jo institucionin, ndërsa për zbatimin e saj nuk kërkohet autorizim parlamentar.
Në arsyetimin e saj, Gjykata analizoi nenin 103 të Kushtetutës, që parashikon imunitetin e anëtarëve të Këshillit të Ministrave, si dhe nenin 73 për shtrirjen e këtij imuniteti. Gjyqtarët u ndanë në dy qëndrime: njëri vlerësoi se pezullimi prek drejtpërdrejt funksionimin e pushtetit ekzekutiv dhe kërkon përfshirjen e Kuvendit, ndërsa tjetri theksoi se masa nuk përfshihet në rastet që kërkojnë autorizim dhe se imuniteti duhet interpretuar në mënyrë të ngushtë.
Për shkak të mungesës së shumicës së nevojshme, kërkesa e Kryeministrit u rrëzua dhe vendimi është përfundimtar, duke hyrë në fuqi pas botimit në Fletoren Zyrtare, do t’iu jemi mirenjohes nese do te na ndihmonit që të mirmbajmë faqen vetëm duke shtypur(mbi foton) që ndodhet më poshtë.Faleminderit për mirkuptimin SHQIPE
