Lëvizja Vetëvendosje dhe deputetët e saj, përfshirë kryeministrin Albin Kurti, nuk kanë mbështetur kandidaturën e deputetit të Lidhjes Demokratike të Kosovës, Kujtim Shala, për postin e nënkryetarit të Kuvendit.
Sipas raportimeve, në prapavijë të këtij qëndrimi qëndron kundërshtimi i Shalës ndaj marrëveshjes së diskutuar mes Lëvizjes Vetëvendosje dhe LDK-së për zgjedhjen e presidentit të vendit.
Kujtim Shala, një nga figurat e rëndësishme të LDK-së, kishte shprehur qëndrime kundër kësaj marrëveshjeje, duke mos e mbështetur formulën e dakorduar mes dy subjekteve politike.
Burime politike pretendojnë se pikërisht ky qëndrim mund të ketë ndikuar në vendimin e deputetëve të LVV-së që të mos votojnë për Shalën në garën për nënkryetar të Kuvendit.
Votimi për nënkryetarët vjen në një periudhë të ndjeshme politike, kur LVV dhe LDK po zhvillojnë negociata dhe përplasje të njëpasnjëshme rreth formimit të institucioneve dhe çështjes së zgjedhjes së presidentit.
Mbetet të shihet nëse mosmbështetja e Shalës do të ndikojë edhe në raportet e mëtejshme mes dy subjekteve politike dhe në marrëveshjet që mund të arrihen në ditët në vijim.
Gazeta Minuti do të raportojë për zhvillimet e reja rreth marrëdhënieve LVV–LDK dhe procesit të zgjedhjes së presidentit.
