Hetimet për vrasjen e 38-vjeçares skoceze Elisabeth-Jane Ross, e njohur nga familja si Lisa, kanë sjellë detaje të reja tronditëse, ndërsa autoritetet greke kanë arrestuar një 26-vjeçar që dyshohet se ka pranuar përgjegjësinë për krimin. Sipas BBC, i dyshuari besohet të jetë shtetas afgan.
Elisabeth-Jane Ross mbërriti në Greqi më 26 qershor. Fillimisht ajo qëndroi te miq në zonën e Keratsinit, në perëndim të Athinës, ku u kishte thënë shoqeve të saj greke se më 15 korrik do të zhvendosej në lagjen Kypseli, për t’u takuar me disa “miq ose të njohur amerikanë”.
Më 10 korrik ajo la zonën e Pireut për t’u nisur drejt një destinacioni në Atikë. Hetuesit ende po përpiqen të konfirmojnë nëse takimi me shtetasit amerikanë u zhvillua realisht.
Trupi i saj u gjet më 18 korrik nga një person i pastrehë, i mbyllur brenda një valixheje, në një godinë të braktisur në lagjen Kypseli të Athinës disa ditë pasi ishte raportuar si e zhdukur.
Sipas ekspertizës paraprake mjeko-ligjore, ajo kishte ndërruar jetë pesë deri në shtatë ditë përpara se të zbulohej, dhe identiteti i saj u konfirmua përmes gjurmëve të gishtërinjve.
Pas analizimit të pamjeve video dhe një pune hetimore intensive, policia identifikoi dhe arrestoi një 26-vjeçar të lidhur me rastin.
Ai u soll në komisariatin e policisë të enjten, ku, sipas autoriteteve, ka pranuar veprimet e tij. Ndaj tij rëndojnë akuza për vrasje, grabitje dhe shkelje të ligjit për armët, ndonëse akuzat përfundimtare ende nuk janë finalizuar nga sistemi ligjor grek.
Sipas hetuesve, pas vrasjes, i dyshuari e vendosi trupin e viktimës në një valixhe dhe e transportoi drejt ndërtesës së braktisur ku më pas u gjet.
Ai dyshohet gjithashtu se ka përdorur kartën bankare të 38-vjeçares për të tërhequr para pas vdekjes së saj, si dhe ka dërguar mesazhe nga telefoni i viktimës për disa ditë, me qëllim krijimin e përshtypjes se ajo ishte ende gjallë.
Gjatë kontrollit në banesën e të dyshuarit, policia sekuestroi një pistoletë dhe një thikë, të cilat u dërguan për ekspertizë.
Autoritetet greke thanë të shtunën se po përshpejtojnë raportet toksikologjike për të përcaktuar shkakun e saktë të vdekjes, rezultate këto që mund të vonojnë nga disa javë deri në disa muaj, në varësi të kompleksitetit të çështjes. Policia po kërkon njëkohësisht të gjejë miqtë amerikanë të Lisës, që thuhet se qëndronin po ashtu në Kypseli.
Kryeministri skocez, John Swinney, e cilësoi rastin si “absolutisht të tmerrshëm”. Një zëdhënës i qeverisë skoceze u shpreh se bëhet fjalë për një moment jashtëzakonisht të vështirë për familjen e viktimës dhe theksoi rëndësinë e respektimit të privatësisë së tyre gjatë vazhdimit të hetimeve.
Zyra e Jashtme e Mbretërisë së Bashkuar ka konfirmuar se po ofron mbështetje konsullore për familjen, ndërsa Policia e Skocisë po asiston homologët grekë në hetime dhe po mbështet të afërmit e Elisabeth-Jane Ross, do t’iu jemi mirenjohes nese do te na ndihmonit që të mirmbajmë faqen vetëm duke shtypur(mbi foton) që ndodhet më poshtë.Faleminderit për mirkuptimin SHQIPE
