Moti pritet të ndryshojë gjatë orëve të pasdites së sotme, ndërsa reshjet do të vijojnë edhe gjatë ditës së shtunë.
Sipas parashikimit të Institutit të Gjeoshkencave, reshjet do të përfshijnë pjesën më të madhe të territorit, por intensiteti i tyre do të ndryshojë sipas qarqeve.
Në Shkodër, Kukës, Dibër, Lezhë, Durrës, Tiranë, Elbasan, Fier, Berat dhe Vlorë, Instituti parashikon reshje të dobëta deri lokalisht mesatare. Pikërisht në këto qarqe reshjet pritet të shoqërohen edhe me shtrëngata.
Në qarqet e tjera të vendit situata paraqitet më e qetë, pasi parashikimi flet për reshje të dobëta.
Ndryshimi i kushteve atmosferike do të shoqërohet edhe me një ulje të lehtë të temperaturave. Për të shtunën, 12 shtator, Instituti parashikon që temperaturat në zonat bregdetare të lëvizin nga 21 deri në 28 gradë Celsius.
Në zonat e ulëta temperaturat pritet të regjistrojnë vlera nga 19 deri në 30 gradë Celsius, ndërsa në zonat malore ato do të lëvizin nga 13 deri në 26 gradë Celsius.
Kushtet e paqëndrueshme të motit do të shoqërohen edhe me erë. Sipas Institutit të Gjeoshkencave, gjatë pasdites së të premtes dhe ditës së shtunë era do të fryjë e lehtë deri mesatare. Në bregdet dhe në zonat malore, në momente të caktuara, ajo pritet të arrijë intensitet të fortë.
